حملة على الفايسبوك

حملة على الفايسبوك (#حتى_أنا_صار_عليّ) للتشهير بأستاذ القانون والمتحرّش الجنسي ساسي بن حليمة :
استجمعت الطالبة مروى المعلاوي إحدى ضحايا التحرش الجنسي لأستاذ القانون والمحامي ساسي بن حليمة شجاعتها وقادت على صفحتها الفايسبوكية Marwa Maalawi حملة إعلامية تحت عنوان (#حتى_انا_صار_علي) لفضح ممارسات أستاذها ولنشر اعترافات ضحاياه من طلبة الحقوق على مدى عقود … ولإنارة الرأي العام ننشر بعض التدوينات والاعترافات المتعلقة بهذه الفضيحة الأخلاقية ...التي هزّت يوم امس 18 اكتوبر 2017 الأوساط الطلابية والحقوقية بتونس …حيث نشرت الطالبة مروى المعلاوي على صفحتها التدوينة التالية :
نحاول نلخص الي صار اليوم الكل  في الفاك كملنا في إمضاء العريضة الي وصلت 155 إمضاء  بعد اجتماع مع العميدة أعلمتنا بالقرار التالي : الأستاذ ساسي بن حليمة معاش بش يحط ساقو في الفاك و احنا بش نتكفلو بحماية الطالبات الكل …. توة نتقلو للشخصي : عندي مشاعر مخلطة بين فرحة وفخر ورغبة أني نبكي برشا برشا خاطر الي ما عاشش تجربة التحرش ماينجم يفهم تجربة كونك تقول أي أنا تحرشو بي ..أي أنا بدني تمسّ بالسّيف عليّ…أي أنا تقالي هكة …وتخزرلي هكة …وأنت تعرف الي بش يقولولك أنت “أش هزّك ” “أش مقرّبلك ليه ” “أش ملبّسك ” ….صحيح مطلب منع دخول الأستاذ للكلية تحقّق …أما الحكاية ماوفاتش هوني ..بعد ما خرج القرار مازلت يجيوني شهادات ….  هذاكة علاه الحكاية مش بش توفى هوني وبش نكمل ننشر عالاقل حيطي أي شهادة تجيني مش خاطرني بطلة وعنيدة وقوية وهاك الكلام الكبير الي خاطيني أما خاطر البنات مزالو يحبو يحكيو ومزالو موجوعين وعدم رؤيته في الفاك بش تخفّف عليهم أما مش بش تداويهم …. علاه خذيت التشهير كأداة مقاومة؟ خاطرو بالنسبة لي أنجع أنواع المقاومة والمحاسبة وخاطر القانون في علاقة بالتحرّش خاصة صعيب برشا بش تنجم تاخو بيه حقك ….هذاكة علاه نطلب منكم من البنات كل في أي فرصة تتيحلكم صوروا المعتدي …نعرف مش ساهل وأنا بيدي عمري لا نجمت نعملها أما نحاولو يولي عنا الروفلاكس هذا نشكر الناس الي اهتموا بالموضوع والي ساندونا والي بعثو رسائل مساندة و نشكر أستاذاتنا وأساتذتنا الي ساندونا و قالولنا “هانا معاكم ”  …حاجة أخيرة : ياسر نفرح بعبارات الحب والمشاعر المزيانة (وياسر مستحقتهم الحقيقة بش نظف روحي مالبهامة الي نرى فيها) أما نحب ناكد على حاجة ياسر تهمني وتمسني : ماهيش عركتي وحدي مانيش …أنا كهو الي كنت سبب بش تتحرك الحكاية منيش الوحيدة الي احتجيت ..مانيش بطلة القصّة ..كان مش البنات الي قدمو شهاداتهم وعطاوني ثقتهم راني قعدت نغني وجناحي يرد علي …كان مش كلامهم مانكملش …كان مش قوتهم راني مانكملش ..أنا مرا سمعتو بيها من برررررررشا نساء ماسمعتوش بيهم وكان انا تعرضت لتحرش لفظي غيري تعرض جسدي ونخبيش عليكم صحيح مبدأ في مقاومة اي ظلم هو الي ينجم يحرّكني ..اما مانحشمش زادة كونه “انتمائي ” للنساء عموما .و.للنساء المعنفات جنسيا و معنويا (حتى كان بدرجات ( هو الي حرّكني #ماتسكتش  #حتى_انا_صار_علي
هذا وعلقت الطالبة منى الماجري على صفحتها Mouné Mejri التحديثة التالية :
على فكرة أشرف عملنا عريضة للإدارة البارح لمينا 150 توقيع و حكينا مع العميدة و خذات قرار بش يمنعوه من الدخول للكلية و كان لزم نجيبو القوة العامة كان حب يدخل بالسيف.
هذا وعلق الطالب بكلية الحقوق بتونس نذير المساكني بما يلي: آني طالب من كلية العلوم القانونية والسياسية والاجتماعية بتونس …. الخبر صحيح و رسمي ومؤكد وموثق  الراجل بغض النظر عن كفاءاته طلع متحرش ببنات الكلية لفظيا وفعليا (يكلم فيهم بكلام قبيح فيه ايحاءات و سمعت هذا قدامو يجي يحكي في الجنينة متع الكلية مع الطلبة (بنات وأولاد) ويجبد في ألفاظ ماهيش في بلاصتها ! لكن من بعد تحولت المسألة الى مسألة “جس البدن” ولى يمس في البنات من أماكن حساسة وقيد على كبر السن و حكى مع طفلة يقوللها “وصلني للتوالات خاتر منجمش وحدي !” (حاشاكم )  ووصل يقول للبنات اكهو موش للناس الكل ” خوذو نومرويا تو نكلمكم كان تحبو دروس للتفسير ايجاو للدار ” …
كما علقت في نفس الاطار الطالبة منى خلاص Mouna Khlass بما يلي : مجموعة المرضى الي سيادتك سبيتهم و الي أنا منهم بكوني طالبة في الكلية رغم عدم تعرضي للاعتداء من قبل هذا الأستاذ إلا واني شفت بعيني ! والله كان تبلات عليه طالبة وحدة وإلا مجموعة نقولوا هوما يكذبوا لكن أساتذة في القانون ومحاميات وتوا فما شكون منهم ولات قاضية وفما شكون في السلك الديبلوماسي هاذم يكذبوا ؟  انك تكون أستاذ وصاحب علم نحترموك لكن انك تجي للكلية تقعد قدام الbuvette وإلا في الجنينة وتبدى تقول في كلام غير لائق على الطلبة الي في يوم من الايام كانوا امانة في يديك وقتها هو الغالط والي يزيد يخليني مستغربة انك تحكي مالمنبر متاعك و انتي ماكش معانا ومشفت شي !  عمادة الكلية أخذت قرار بمنعو لدخول الكلية ! شبينا قرينا عند أساتذة كبار كيما حاتم قطران وسليم اللغماني وقيس سعيد وغيرهم من احسن ما انجبت البلاد ؟ لا لشي الا لانهم يحترمونا ويقدرونا و يشوفوا فينا قدوة ويراو فينا قضاة المستقبل ومحاميات ويراو انا في نهار نجموا نوليو زميلاتهم !  حاجة تحسن انو إنسان كيما هكا يقوم بتصرفات كيف من هكا تخليه عقاب عمرو يفقد احترام الطلبة والأساتذة ومن العملة متاع الكلية !  العلم ما يشفعش في الجرائم ! والقانون يعلو ولا يعلى عليه و هذي من المبادئ الي قراوهنا….
فيما نشر اشرف العوادي عن جمعية “اي واتش  I WATCH ” الاعلان التالي في تعليقه على الفضيحة الاخلاقية المدوية :
الفتيات (وفي محاولة للتكفير على التحرش متاع ابناء جنسي). انا نهار كامل نبحث في القرجاني لذا قضية زايدة موش مشكل. الي صارلها تحرش و حاشمة فقط ابعثلي اسم المتحرش و تو انا نشهر بيه (بعد ما نحلو عليه الكتاب كيما يقولو الاصدقاء في القرجاني) كيما الاخ ساسي بن حليمة…  كان تحب تشكي بيه مع الحفاظ على سرية هويتك، كيف كيف الفريق القانوني متاع اي واتش على ذمتك المهم ما تسكتش. السيد هذا اكيد قرا ناس نحبهم و كيفو باش يقريو ناس نحبوهم. ! !